Roller se motor.
Twee leerders van Laerskool Hartenbos is dood in die ongeluk wat op Vrydagaand, 10 Februarie, op die hoek van Louis Fourieweg en Kaap De Goedehoopstraat in Hartenbos plaasgevind het. Danté Hageman (10) en Sonja van Wyk (11) is uit die voertuig geslinger nadat Friedl Roller (39) na bewering teen 'n hoë spoed met die voertuig waarin hulle instittendes was, gebots het.
Sonja se pa, Jaco, en haar suster, Janika (7), was ook in die voertuig. Hulle is beseer en is tans in die George Provinsiale Hospitaal.
Volgens die woordvoerder van die polisie se Suid-Kaap kantoor, Kaptein Malcolm Pojie, het Roller in 'n Ford Focus 'n verkeersbeampte oor 'n sperstreep verbygesteek. Die beampte het hom van die pad getrek, waarna hy na bewering teen 'n hoë spoed weggejaag het. Die verkeersbeampte het Roller gevolg en gesien hoe hy rooi verkeersligte verontagsaam voordat hy teen die Opel, waarvan Jaco van Wyk die bestuurder was, gebots het.
Volgens Pojie was wrakstukke so ver as 100 meter oor die pad gesaai.
Roller het geringe beserings opgedoen. Hy het op Maandag, 13 Februarie, in die Mosselbaai Landdroshof verskyn waar hy om borgtog aansoek gedoen het. Verskeie familielede van die oorledenes het hom voor die hof ingewag. Hy is as 'n moordenaar uitgeskel toe hy met krukke uit die aanhoudingselle gekom het.
Roller het verwese voorgekom en wou nie hê die media moet foto's van hom neem nie. Hy het aansoek gedoen om regshulp. Die saak is uitgestel tot 21 Februarie.
Volgens betroubare inligting is Roller by herhaling in die verlede skuldig bevind vir dronk-, roekelose- en nalatige bestuur.
Roller staan nou waarksynlik tereg op twee aanklagte van moord.
Roerende huldeblyk vir Danté
07:00 (GMT+2), Fri, 17 February 2012
Danté, gebore op 1 Maart 2001, het op 10 Februarie 2012 in 'n motorongeluk in Hartenbos gesterf.
Danté se kis word tussen ‘n erewag van haar maatjies deur na die lykswa gestoot.
Roubeklaers se snikke het in die stilte van 'n stampvol NG Kerk op Hartenbos opgeklink toe ds Johan Engelbrecht Woensdag, 15 Februarie tydens die roudiens vir Danté Hageman, troos probeer bring het. Die kerk was so vol dat hulle mense in die aangrensende saal moes akkomodeer.
"Daar's 'n liedjie wat lui: 'God hou van jong mense' en ek twyfel nie dat hierdie blondekoppie nou by Hom is nie," het 'n merkbaar aangedane Engelbrecht gesê.
Ds Engelbrecht het gesê: "Ons moenie kwaad bly vir die oom wat die ongeluk veroorsaak het nie, ons moet vir hom bid, sodat die Here sy hart sal verander." Engelbrecht het gesê God skets 'n groot prentjie soos die van 'n kunstenaar en dat ons op aarde dikwels net 'n klein stukkie van die groter prentjie raaksien.
Roubeklaers kon weens hul hartseer nie die liedjie op die begrafnisbrief; 'Dit borrel in my', voluit sing nie. Die kinderstemmetjies van die skoolkoor van Laerskool Hartenbos het die woorde van die liedjie deur die stil kerk laat vloei terwyl familie, vriende, maatjies, onderwysers en gemeenskapslede trane afgevee het: "Dit borrel in my want ek is so bly, Jesus het my lief. Vir my't Hy gesterf en gered van verderf, Ja, Jesus het my lief".
In sy gebed het die aangedane ds Engelbrecht, wat op tye vir 'n paar sekondes telkens tot verhaal moes kom voor hy verder kon praat, hard gebid: "Ek slaan my oë op na die berge: waar sal my hulp vandaan kom? My hulp is van die Here wat hemel en aarde gemaak het."
In 'n brief vir Danté, wat Engelbrecht voorgelees het, het verskeie lede van haar familie hul liefde aan haar betuig. Haar oupa het gesê hy gaan dit mis om met haar te speel. "Maak vir ons 'n plekkie gereed daar by jou," het sy harsteer brief aan haar gelees.
Leerders van Laerskool Hartenbos het 'n erewag buite die kerk gevorm toe maatjies Shauri, Sharlise, Sonique, Dylan, Loukie, en Danté se boetie, Bradley, die handvatsels van haar wit kissie gevat het.
Die kinders kon nie die kis van die waentjie oplig nie en het tussen die snikke van die leerders deur, die kis op die waentjie by die voetpaadjie afgestoot.
By die lykswa het Danté se pa, Mark, vir 'n oomblik getalm en sy hand op die kis gehou. Haar ma, Debbie, moes deur familie ondersteun word toe sy 'n laaste roos op haar dogtertjie se kis geplaas het. Danté se oumas en oupas het hartverskeurend by die kis gehuil.
In die laaste sinne van die begrafnisbrief het haar ouers geskryf: "Ons dank die Heer vir die tyd wat Danté aan ons geleen was, ons sal haar altyd onthou. Ons berus ons en dank Hom vir al die mooi herinneringe wat ons van haar bymekaar kon maak."
Sonja, die omgeekind
06:00 (GMT+2), Fri, 17 February 2012
Sonja Monique van Wyk, 13/7/2000 - 10/2/2012, was ‘n omgeekind wat veral vir haar maklike glimlag en minsaamheid onthou sal word.
Vra 'n mens die onderwysers by Laerskool Hartenbos wat hulle die meeste van Sonja van Wyk opgeval het, antwoord hulle asof uit een mond; haar innemende geaardheid! Hierdie omgeekind word onthou vir haar vriendelikheid, behulpsaamheid en pligsgetrouheid.
Sy was die dogter met die vinnige glimlag wat soveel maatjies se lewens met haar vriendelikheid aangeraak het.
Haar beste maatjie op skool, JD King, het ongelukkig verlede jaar Hartenbos verlaat.
Sonja, soos Danté, het veral met hul aanleg vir kuns beïndruk.
Haar ouma, ook Sonja, sê haar kleindogter was 'n regte staatmaker. Sonja het sonder skroom graag na haar jonger sussies omgesien. Ouma Sonja sê sy sal haar sonskyn-naamgenoot, veral die drukkies wat sy so graag uitgedeel het en haar minsaamheid, mis.
Sonja word môre, Saterdag, 18 Februarie om 14:00 vanuit die Laerskool Hartenbos se skoolsaal begrawe.
